迷你苦主

　　有時真係覺得香港人好鬼肉酸，個世界一發生咩事，唔理乜都好，明明係自己戇尻咗，總之衰咗定係連累到佢自己定係乜都好，就永遠賴社會賴地硬，最戇尻果批最鐘意懶齊心一呼百應幾百幾千人咁出黎喊苦喊忽。話說雷曼KO咗之後，好多股民受累，輸到阿媽都唔認得，今日又如常上網睇新聞，點知真係見到有位輸咗二百幾萬既黃姓仁兄連自己老母過身都賴銀行呃尻佢！
　　琴晚就有八百個受累股民開咗個什麼苦主申訴大會，而民主黨就拉晒馬同金管局啲人舉行會議。據班苦主所講，佢地係「被銀行哄騙認購咗雷曼兄弟嘅迷你債券同埋一啲相關既產品」，又話金管局同證監會批出產品是「又盲又聾又啞」，喊晒口要求商罪科調查有關事件，又要消委會介入調查銀行嘅銷售手法係咪有唔妥令佢地「誤墜圈套」，仲準備向分銷機構進行集體訴訟云云。
　　好啦，我唔理人地係咪呃你老味哄你買野啦，或者銀行哄你買果時係冇具體講明啲產品係同雷曼掛釣，如果係既話，咁銀行當然係要負責啦，或者你咁醒買果時一知道係關雷曼事就實行耍手兼拎頭啦！但係，喂，冇理由你自己俾人呃尻你買咗個Ａ貨ＬＶ，發現放唔返出去之餘仲要比正貨買貴咗，"薜"到跌渣之際，點知第二日屋企隻狗瓜埋柴、水電都停埋，惡耗連連，都唔可以怪你屋企冇米係米蘭站坤你買咗個Ａ貨架話？計我話呢班苦主正宗係港人心態，告得就告，有乜風吹草動就總之係你錯，唔理發生咩事總之就告你一鑊先，搵人查你家宅查到你冇事變有事！ 或者咁啦，成件事只不過係唔知邊條友請著個文筆差嘅記者，寫到果位黃姓仁兄死老母好似要賴銀行賴雷曼賴股市咁囉！以前做記者時都聽過下呢間報館出稿係幾咁唔負責任架喇！
　　依家個世界就係咁，唔知邊個跌咗條毛整污糟咗啲地方，就攪到全世界人都唔可以有毛，人人都要剃光光無一幸免－－由細到大每次食大白兔糖都幾打幾打咁上，今日想食一粒都冇喇！